JAWAB SI PANGKALAN
Lah sampai dek angku Datuak (Sutan). Dek gunuang tapatan kabuik, di sungai jalo bamain, ka padang marantang tanah, ka rimbo bakarek kayu, tabiang ditingkek dengan janji, rimbo dialah jo mufakat, tagak dek duduak di nan rapek, limbago basidang dalam adat, kaik-kaik rotan sago, bakaik-bakaik jo durinyo, samantaro kaik salasai, supayo rundiang nan saukua, supayo satuju ka nan baiak, nak sapakat ka nan elok, suto jo turak nan salasai, nak samo naiak diantakan, diukuah kato nan sapatah, mananti Datúak (Sutan) sakutiko, sakian sambah dari ambo.
MANGAMBALIKAN KATO
Adopun tawalak kato tadi, dilatak dalam mufakat, diambiak bulek sakato, tagah dek padoman adat, dek adat Datuak barapek, dek pusako duduak basamo, tak lalai rundiang bakeh Datuak (Sutan), ampun jo relah kami mintak.
Tantang rundiang Datuak (Sutan) nan talimpah kapado kami, lah tabayang ujuik mapahum, lah tantu tujuan batin. Dek kami si pangkalan, lah basuo kato bida adat, lamak kato dilega buni, lamak siriah lega carano, bulek aia ka pambuluah, lah bulek kato ka mufakat, bulek lah bulieh digolekkan, pipiah lah buliah dilayangkan, ka ateh alah sapucuak, ka bawah lah saurek, kok kandak raso kababari, pintak lai kabuliah, tapi samatang pun baitu.
Tantang minum dengan makan, sarato jo duduak di tangah rumah, makan kok kurang kanyang, minum kok kurang sajuak, duduak kok kurang endah, dek manusia bersifat Qadim, basalah kami ka si alek, tantangan rundiang nan baitu, dimintak maaf banyak-banyak, kapado dunsanak nan datang iko kini, sakian jawab dari kami.
166
