Bab XIV
Pasambahan Turun Tanggo (II)
Sungguahpun Datuak (Sutan) surang nan diimbau, nan tinggi nan tampak jauah, dakek jolong basuo, diagak dikanang-kanang, ditimbang sahabih patuik, manakuah hambo ka bumi, maninggadah hambo ka langik, satitiak tumbuah nan baiak, kian dek iradat nan bakandak, dek kudarat nan kuaso, isinyo adat dengan syarak. Partamo syarak nan maujuik, kaduo adat nan maha judu, pihak di syarak nan maujuik, warih rang koto nan piliang, adat Datuak Katumangguangan, sa ukua kato sasuai, sapakat karajo lah manjadi, putuih nan tidak bakaruan, alauh nan tidak basalisiah, lah sunyi ijab jo kabuah, lah santoso paradu a'in, hukum patuih tampek bagantuang.
Limbak nan daripado itu, tantangan adat mahajudu, warieh ruang Bodi Caniago, adat Datuak Parpatih Nan Sabatang, maliek luruih batujuan, mamanang adat bajukalo, kok luruih manahan tiliak, balabeh manahan cubo, batuak dimakan siku-siku, bungka ganok manahan asah, hukum adia manahan bandiang, kato bana manahan liek, banamo japuik jo anta, basambiah arak jo iriang, arak iriang sapanjang jalan, nan badombai sapanjang labuah, tangtangan isi lah baitu, lah tagantuang ka pucuak bulek, lah tatambang kaurek tunggang, lah bulek pati amba lau, kataungkai raso tak tangga lai, tak mungkin, antah garak pada Allah.
Pihak di diri marapulai, kok masin lidah baliau, kusuik bao manyalasai, kok karuah bao manjanihi, kok elok ratak tangannyo, kok panjang baok mangarek, kok singkek baok mauleh, kok senteang baok mambilai, baok sahilia jo samudiak, atau salenggang jo sarayun. Limbak nan daripado itu, nan bak ibarat balibih tabang, tabang ka langik nan taserak, hingok ka dunia nak sarakam, sakaji kami nan mandatang,
170
