Bab XV
Sambah Mintak Mando'a
Dek niat sapanjang hari, dek ikara sapanjang gawa, dek gawa sapanjang diam, awa dibuek minum makan, Quran dibaco niat nazar, kok kurang salamaik samporono, kok ampiang-ampiang sapadi, kok sumbiang, sabareh, maaf jo rela pamanuhi.
Limbak nan daripado itu, ucapan Datuak si pangkalan, dicari bulek sakato, alah diampiang picak-picak, alah digeleang bulek-bulek, picak lah buliah dilayangkan, bulek lah buliah digoloangkan, handak mamintak do'a salamat, pintak nak sampai pado Allah, saru nak lalu ka junjuangan, nan mati-mati dahulu, walau di darek jo di rantau, walaupun baliau tak didunia, namun arawah tacinto juo, nan sainggo iko kateh, bumi sanang padi manjadi, umuah panjang razaki murah, kapado marapulai nan taduduak, di ateh rumah, baitupun kapado kito nan basamo, jangan lah tumbuah silang salisiah, sumuah dikali aia tibo, babaco doa sapatah, sakian sambah dari kami.
JAWAB PANEMPOKAN KATO
Nan sapanjang kato Tuan iyolah sabananyo, didanga lah baiak buni, dipandanglah baiak rupo, tapi samantang pun baitu, nan bak umpamo rang mamukek sadang marantang tali ijuak, iyo ka tangah lawik basa, mangaruang buieh jo alunan, lah dipandang hilia jo mudia, lah diliek kiri jo kanan, lah tampak ambai nan bagoyak, lah jaleh daun manyalisiak, nan sekarang iko kini, lah elok ditimpo manieh, lah rancak ditimpo baiak, basi baiak diringgiti, nan sakarang iko kini, manjalang
172
