Bab XVI
Induak Pasambahan
Maa Angku Datuak (Sutan) . . . sambah tibo pado Datuak (Sutan). Sambah saujuik salam diangkek, salam dianjuang kiri-kanan, lahiah kapado Datuak (Sutan) surang, batin mahadap ka nan rapek. Sambah kapado Niniak jo Mamak, sampai ka kaum jo famili, sarato rang banyak nan lah hadia. Dipabanyak redo jo ampun, ditagui salam jo maaf, maaf dimintak di nan banyak, ampun disarahkan kapado Allah, titah diserah pada nabi, sambah taujuik bakek Datuak.
Tatkalo sumua dikali, tatkalo rantiang ka dipatah, iyo nagari ka diuni, di balai balairuang panjang, atau di Pariangan Padang Panjang, namo dahulunyo. Di sinan lah Datuak parpatieh Nan Sabatang, duo jo Datuak Katumangguangan, manurunkan adat jo pusako, dietoang koto jo nagari, sarato luak jo rantaunyo, luak tigo lareh nan duo.
Manyo lareh nan duo, partamo Bodi Caniago, adat Datuak parpatieh Nan Sabatang, asa nan dari Indo Jati, kaduo lareh Koto Piliang, adat dek Datuak Katumangguangan, inyo asa dari rajo. Manonyo luak nan tigo, partamo luak tanah data, nan babatu bungo satangkai, nan basungai bakayu tarok, nan bakampuang di baliak labuah, nan banamo Dusun Tuo, balimo kaum di sanan, sambilan koto di dalam, duo baleh koto di lua, batabek basawah tangah, sawah gadang satampang baniah.
Kaduo luak dari agam, nan salilik Gunuang Marapi, saedaran Gunuang Singgalang, lapeh sacdaran Gunuang Pasaman, sahinggo lado sulah mudiak, sahinggo dusun tungga hulia, katigo luak ranah limo puluah, dari sisauak sungai rimbang, sampai ka sipisau-pisau anyuik, sialang balantak basi, sikokoh pinang tuo. Itulah warih nan bajawek, itunyo tutuah nan didanga, kini tasabuik-sabuik juo. Ujuang
174
