labuah Tanjuang Sungayang, di dalam luak jo lareh tujuah koto di dalam. Babasa baampek balai, badaulat nan dipatuan, kabaruah lunang gunuang pasisieh, hinggo pintu rajo hilie, ilia badatuak, mudiak batuan. Tuan qadi di Padang Gantiang, Indo mo di Saruaso, Mahkudun di Sumaniak, Tita si Sungai Tatarab, Tuan Gadang di Batipuah, Rajo asa di Pagaruyuang, itunyo urang nan mamarentah, dalam luak nan tigo, sarato lareh nan duo.
Tasabuik luak lubuak Agam, sahinggo lado sula mudiak, sahinggo dasun tungga hilia, salilik Gunuang Marapi, saedaran Gunung Pasaman. Tasabuik luak limo puluah, aia janiah sayaknyo landai, hinggo sisauak sungai rimbang, hinggo sikokoh pinang tuo, hinggo durian ditakuak rajo, si pisak pisau hanyuik, sialang balantak basi. Dalam luak jo lareh, balimo rajo di dalam. Partamo rajo nan di luak, kaduo rajo di sandi, katigo rajo ranah, ka ampek rajo di hulu, kalimo rajo di lareh. Nan banamo pamuncak adat, nan bajanjang ka koto rajo, nan bapintu ka Sungai Patai, timbangan Datuak Makhudum, nagari salamat samparono, cukuik jo bari jo balebeh, langkok jo adat jo pusako, utang dek kito mamakaikan.
175
