daun nipah, bulek nan nyato bapasagi, Diliek lipek tak barubah, dibukak lah tambuak tiok ragi. Jalan dialiah dek rang lalu, cupak dipapek rang manggaleh, adat dialiah dek rang datang. Ukuah jo jangko kok tak tarang, susunan niniak-muyang kito, dek rancak kilek loyang datang, intan disangko kilek kaco.
Kilek baliuang lah ka kaki, kilek camin lah ka muko, gabak di hulu tando ka hujan, cewang di langiek tando ka paneh. Kalau malantai sabalun lapuak, jikok maminteh sabalun anyuik, ingek samantaro balun kanai. Di doroang dek caro nan bak kian, tumbuah lah niat dalam hati, kacalak-calak ganti asah, pananti dukun jalang tibo, panunggu tukang jalang datang, manyusun buku adat, ajaran adat Minangkabau, baguno untuak bundo kanduang, parintang-rintang katiko duduak, untuang-untuang baguno ka urang banyak.
Manusia basifat kilaf, Tuhan Allah hanyo nan qadim, kok basuo kilaf jo kilafat, indak dikasad disangajo, ampun jo maaf ambo pintak, disusun jari nan sapuluah, disusun lutuik nan duo, kapado bundo kanduang di Minangkabau, sayo minta dimaafkan, kok ado kato banan bukan, anjak dek bundo ka nan bana.
Terima kasih.
Wabillahi taufiq walhidayah,
Penyusun
