1. Arti penghulu ditanjung: Sapantun siponggang dalam ngalau atau diguwo ranggo tabiang. Kito mahariak inyo mahariak. Kito babunyi inyo babunyi. Jiko diimbau babunyi ado. Tapi jiko dituruik indak basuo. Diliek indak barupo, babunyi dibunyi urang. Itu penghulu basipek duto, kareh antak indak lalu, bakabanaran di haluan urang.
2. Arti penghulu ayam gadang; Bakotek hilia jo mudiak, bakukuak kiri jo kanan, mamanggakkan tuah kamanangan, tiok ado kabaikan tumbuah, awak nan pokok pangkanyo, baiak urang nan punyo rancana, dilipuah jo lamak manih, itulah ayam gadang. Bakotek indak batalua, tinggi lonjak gadang galapua, lago di bawah sajo, gadang tungkuih indak barisi, elok bungkuih pangabek kurang.
3. Arti penghulu buluah bambu; Batareh tampek ka lua, tapi di dalam kosong sajo, tampan elok takah balabieh, lagak rancak aka tak ado, ilmu jauah sakali, kacak langan lah bak langan, kacak batih lah bak batieh. Awak datuak jano awak.
4. Arti penghulu katuak-katuak: Iolah tongtong urang di ladang, kalau diguguak inyo babunyi disaru urang baru basuaro, ka mangecek takuik balabia manjadi damuik barek bibia, babicaro kapalang aka, bapikia saba tak ado, itulah penghulu katuak-katuak.
5. Arti penghulu tupai tuo: Elok nan tidak mangalua, gadang nan tidak mengatangah dibao manyuruak sajo, bagai karabang talua itiak, rancaknyo tabuang juo, indak kambali naiak lai, baitu sipek tupai tuo, indak tatampuah ujuang dahan, diam di bawah tapi sajo. Itu penghulu kalindung, halek jamu indak tajalang, alur tidak nan baturuik, jalan nan indak batampuah, manaruah sagan jo ragu.
6. Arti penghulu busuk hariang: Itu penghulu nan jahanam, hino bangso randah martabat, hati mahiang pahamnyo busuak, budi anyia pikiran hariang, panjang aka handak malilik, panjang bicaro nak mangabek, cadiak andak manganai sajo, muluik manih umbuaknyo, tukang piuah tukang
pilin, pilin kacang nak malilik, pilin jariang nak barisi, pangicuah urang dalam nagari, panipu korong jo kampuang, panjua anak-kemenakan, palakak kuciang di dapua, mancari dana ka bawah
102
