Adapun arti mudo parisau: siang malam bahati rindu, patang pagi bahati rambang, balun diimbau lah babunyi, balun dikubik nyolah datang, balun dijujai nyolah galak, bak katidiang tangga bingkai, bagai payuang tabukak kasau, pahamnyo kambiang dek ulek, sabab digilo-gilo angan-angan, itulah sifat mudo cilako.
Adapun mudo pangusau: iyolah bak pantung urang tuo, cincin perak duo parmato, cincin timbago bakilatan, lah ribuik sapanuah koto, adat rang mudo kasabutan. Hilia mudiak inyo manyusah, kiri kanan mamacah parang, dari jorong ka sapanuah koto, dari kampuang, ka saganap kampuang, barang taumbai nak maelo, apo nan tampak nan manariek, inyo nan mandapek sajo, maminta indak dengan suko, mambali indak dengan harago, bagai balam tabang randah, ayam dilasuang tasimbaba, sabab dimabuak uwe-uwe, nan panggadua gadiburang.
Yang banamo mudo langkisau: ialah yang mudo lidah aia labuah sampiek kudo panyipak, arang kareh lari manyimpang, ikua kupik kapalo randah. Jangguik taba ajaran kurang, aka buruak i'tikat salah, manaruah dangki jo khianat, itulah mudo nan cilako sabab takabua dalam hati, tidak mamakai raso pariso, tidak manaruah malu jo sopan, hereng jo gendeang apo lai.
Cilako Tuo banyak Macamnyo
Partamo nyinyia tak manantu, kaduo damuik badan jantan, katigo riang-riang asam.
Arti nyinyia tak manantu: bak balam talampau jinak, maanguak-angguak tabuang aia mancotok-cotok kili-kilinyo.
Dima buak kecek Junak-lambuik, rundiang bak sarasah tajun, indak mambari pengajaran, kato bak bunyi gunuang runtuah, indak banasehat baimanat, batutuah baolok-olok , manyingguang mato bisua urang, itulah tuo nan cilako sabab tak ado barilmu.
Arti damuik badak jantan: tak saketek juo, tahu diduri, kulik surih jangeklah luko, namun lenggok baitu juo, bagai kabau jalang karteh hiduang, parunyuik pambulang tali, indak tahu di mano kandangnyo.
Bak ilemu tukang rabab, tak buliah bakahandak hati, hanyo manurik katonyo surang, sadikit pun tak buliah disalahi, itulah tuo nancilako, sabab miskin pado budi.
101
