indak tagadai, bapantang kuniang karano kunik, indak namuah lamak karano santan.
Kok mangganggam nan saitcek,
Pahamnyo jago dibicao,
Kajadi incek rambu monyek,
Itu nan jadi pantangannyo.
Sampiang (Saruang)
Saruang sabidang di ateh lutuik, kayo dan miskin alamatnyo, ado batampek kaduonyo, luruih dalam tak buliah senteang, patuik senteang tak bulieh dalam, karajo hati ka samonyo, mungkin jo patuik baukuran.
Tanah merah bacukalat, tando barani karano bana, ilemu bak bintang bataburan, sumarak di dalam koto, mancayo masuak nagari, dalam martabat nan tigo, kayo hati miskin hati, di ateh jalan kabanaran.
Namun nan baiek nan dimintak, sebab tak Jarangan di penghulu, alun bakandak lah babari, alun mamintak lah maagiah tapi kok ado tuntunan ka nan buruak, atau ka nan indak baiak, baratuih batu panaruang, tatagak paga nan kokoh, parik tabantang manghalangi, baampang lalu ka subarang, badindiang sapai ka langik, haram kandak bapalakuan.
Payakumbuah baladang kuniek,
Dibao nak arang ka Kuantan,
Bapantang kuniang dek kunik,
Tak namuah lamak dek santan.
Cawek (Ikat pinggang)
Cawek suto bajumbai alai, saheto pucuak rabuangnyo, saeto pulo jumbai alainyo, jumbai dan tangah tigo tampok, kapalilik anak-kemanakan, kalau tapaciak dikampuangkan, kalau tacicia inyo japuik, kan panjarek aka budinyo, kan pamauik pusako datuak, nak kokoh lua jo dalam, nan jinak nak mangkin tanang, nan lia jan batambah jauah. Kabeh sabalik bahua sintak, kokoh tak dapek kito ungkai, gunyahnyo bapantang tanga. Lungga bak caro dukuah dilihia, babukak mangkonyo tangga, jo rundiang, mangko taungkai, kato mufakat pambukaknyo.
107
