Talago Di Bawah Gunuang
Angin kantjang bukan kapalang, Tagerai rambuik nan pandjang, tasimbah-simbah kain di badan, namun lari ditjubo djuo.
Langkah nan pandjang manuruikkan, mangadja djuo dibalakang. Dek lamo lambek mangadja, dapek tangannjo dek Marah Baganti, ijolah tangan Puti Marintan Aluih. Dipatjikkannjo arek-arek, indak dapek manggaleta lai, galak badarai maso itu.
Batambah tasirok darah di dado, bakutjak iman urang mudo, maliek rupo gadih nantun, rantjak nan bukan alang-alang, tjando dilukih digambakan.
Bunji angok bak kudo dilalah, paluah basimbah pado badan. Kunun di Puti Marintan Aluih, takuik batjampua djo tjameh, malu rasonjo indak tabodo.
Bakato Marah Baganti, galaknjo badarai-darai, “Manolah Puti djanjo denai, kamano djuo Puti kalari, indak kalapeh dari tangan!
Bakato pulo Puti Marintan Aluih, injo marengek-rengek ketek, “Tuan denai urang disiko, lapehkan baa tangan denai, malu diliek urang lalu, djokok nampak dek urang banjak, barapo buruaknjo sangko urang, Tuan budjang denaipun gadih. O, tuan djo den dituan, lapehkan malah tangan denai.”
2
