“Manolah adiak kanduang denai, bari maaf den di adiak, adiak nan indak kadenai lapehkan, bodoh bana malah denai. Denai mandapek durian runtuah, putjuak ditjinto ulam tibo, aie dalam karang manonggok, setanggitjampua kumajan, sirindu batjinto hati. Mano buliah adiak babaliak.”
Galaknjo badarai-darai djuo, lah habih hari dek kutjikak, barapo garah djo kutjindan, tangan nan aluih njo patjikkan djuo.
Alah patang tjandonjo hari, babondong buruang kasarangnjo, bagageh taranak babaliak pulang. Namun rang mudo Marah Baganti, duo djo Puti Marintan Aluih, gilo dimabuak reno hati, tjinto bapadu maso itu, samo tadajo kaduonjo. Sungguah samantang pun bak nantun, tabik tangihnjo Marintan Aluih,
“Indak hibo tuan di denai, barapo karusuah mande denai, tjameh mamikiakan badan denai, alah tagamang garan tu kini, pai nan indak babaliak djuo, barusuah hati siang malam, rindu di badan diri denai.”
Bakato pulo Marah Baganti, bakato basungguah-sungguah, “Adiak kanduang puti Marintan Aluih, djokok adiak ka pai djuo, denai nan indak amuah malapeh surang. Bialah denai maantakan, denai nan indak amuah tingga. Sio-sio denai malapeh adiak. ka badjalan surang sadjo, ka malalui rimbo balantaro, apolai pulo adiak kanduang, danai batjinto pado adiak.”
“Tuan denai Marah baganti, dangakan malah kato denai, dimano buliah tuan pai, kito nan indak urang sabangso. Tjubo pikia malah dek tuan, dimano dapek kito badjodoh, tuan didunia denai dilanggik.
Kok kasiah tuan lah tahu, kasiah denai baitu pulo. Sungguah samantang pun bak nantun, djokok dikadji asa djo usua, indak elok kito badjodoh, buruak djuo akia kalaknja.”
Duduak tamanuang Marah Baganti, aia mato iriang gumiriang, djauh tahibo dalam hati:
6
