“Adiak kanduang Marintan Aluih, indak hibo adiak di denai, sampai hati adiak badjalan, maninggakan denai dalam batjinto.
Bialah denai mati disiko, pado hiduik baputiah mato, eloklah mati baputiah tulang. Iko karih tikamlah denai, usahlah adiak babanjak helak, nampaknjo adiak indak pitjajo,
hati nan duo tangah tigo
amuah lai pitjajo tido.
Apo gunonjo hiduik lai, ambiak karih balah dado nak sanang hati badjalan, usah dikana kana djuo.”
Kunun rang gadih Marintan Aluih, mandanga kato nan bak kian, raso tasingguang udjuang djantuang, hanguih rasonjo dalam dado. Hati lakek tjinto batampo, dek mato palingan sjetan, dek hati palingan Allah, awak nan samo rantjak pulo, awak samo mudo matah. Lalu bakato maso itu. “Manolah tuan Marah Baganti, tjubolah pikia malah dek tuan, laikah mukin denai djo tuan, ka ba apo kato urang banjak, bak mano bitjaro mandeh djo bapak, apo katenggang badan denai, denai badjalan mantjari djodoh, laikoh patuik nan bak kian, indak biaso nan bak nantun. Malu malah dunsanak denai, djadi galakan urang nagari, djadi gundjingan kasudahannjo.
Sabaliak lai tjubo pikiakan, karano kito indak sabangso, misiki denai ado babangso, dibanso tuan hino djuo. Baitu djuo garan Tuan, sakalipun radjo tuan di siko, dinagari denai randah djuo. Baitu adaek samanjak dahulu, damikian pandapek nan balaku, adaik salaruik salamo iko, sadjak samulo aia ilia, sadjak samulo awan putiah, sadjak salamo gagak hitam, sampai kini balun baubah, pikiakan bana malah dek Tuan.”
“Tantangan dikato adiak nantun, itulah kato sabanajo. Sungguah samantang pun nan bak mantun, didenai nan indak paduli. Mangapo diindahkan kato urang, mangapo di dangakan iko etan, mangapo manjeso nan biaso, djokok sabananjo adiak batjinto. Mangapo dihetong labo rugi, roman bak tjando urang manggaleh,
8
