nan manimbang sapitih djo sagadang. Kasiah denai indak baitu, indak denai baduto hati, usah di timbang djo ameh perak, usah dinilai djo dirago. Santano adaik handak manimbang djuo, timbalannjo njao badan sadjo!” Galak tasanjum Marintan Aluih, pipi marak manjirah djambu, manambah manih maso itu, injo bakato sambia manakua: “Tuan denai Marah Baganti, djokok kasiah nan tuan sabuik, tjinto tadorang pado tuan, kasiah tadjarek dalam hati, habih njao bakisai badan, hanjolah tuan tampek hati. Lupolah denai pado diri, lupolah denai pado asa, mabuak batjinto dalam hati.” Mandanga kato nan bak kian, mandanga kasiah lai basambuik, djokok tjinto lai babaleh, batapuk nan indak sabalah tangan, hati nan kambang-kambang, kian sadjuak rasonja kiro-kiro, sananglah hati maso itu, batjampua dengan arok tjameh. “Manolah Puti Marintan Aluih, adiak kanduang sibiran tulang, tjajo mato idaman hati, sabuah lai kato denai, nan ka adiak pikiakan bana. Lorong kapado badan, denai alah lamo mantjari, alah banjak rantau tadjalang, lalu Agam tanah darek, sampai karanah Limo Pululuah, sampai ka Luhak Tanah Data, alah denai tampuah denai djalani, lalu ka Kubang Tigo Baleh, sampai ka ranah Sungai Pagu, barapo anak radjo-radjo, sarato puti nan pilihan, indaklah basuo denai nan dihati. Ado nan rantjak ado nan manih, nan bapipi pauh dilajang, nan bamato galinggang lalok, nan bapandangan sirauik djatuah. Kok bibianjo asam sauleh, galaknjo rangkah giginjo gewang diasah. Baitu djuo budi parangainjo, sapadan saimbang djo ruponjo, muluik manih bakato pandai, tjakap mananti tamu datang. Kok hidangannjo baitu pulo, bak bungo kambang sataman, indah rupo harum baunjo, sanduak nasinjo samuik baririang, tuang aianjo tak panuah tak tumpah, pandai mamasak djo manggulai, tahu manjulam manarawang, tjakap batanun djo manakek. Alah langkok ganok nan basuo, babagai roman djo tampannjo.” 10
