Sapueh-pueh dek mandaki, manurun pulo maso itu, binatang rimbo badangusan, ula malingka ateh taduang, maintai dibaliak dahan, harimau malinteh-linteh djuo, tabiklah takuik maso itu, raso ka habih njao badan, dilulua ula gadang-gadang, disuntiah dek biruang rimbo.
Alah panek garan tu kini, dek lah lamo manurun mandaki, lalu bakato Marintan Aluih, “Manolah tuan djanjo denai, alah djauahkita badjalan, alah panek tuan mandukuang, ijolah anak kanduang kito, mari kasiko denai gantikan!”
Mandjawab Marah Baganti, paluahlah rinai dikaniangnjo, pungguangnjo lah basah pulo,
“Bialah denai mandukuangnjo, rimbo gadang nan kito tampuah, barapo pulo pasawangan sadjo. Taruihkan sajo kita malah djalan.”
Dek lamo lambek didjalan, alah mandata maso itu, manampuah padang ribu-ribu, tampak talago dari djauh. Lalu bakato Puti Marintan Aluih, “Manolah tuan djundjuangan denai, alah tibo garan kito, ditalago Pintjuran Puti. Samintaro hari balan tinggi, elok basigiro malah kito, nak dapek djuo kito tibo, dihari nan sahari nangko, ijo dirumah mande kito, alah raso basuo garan tu kini.”
“Djokok Baitu kato, adiak denai manuruik tantang nantun, apokoh karadjo badan denai amak denai langsungkan pulo.”
“Basugiro malah kito, ijo di Pintjuran Puti nangko. Djokok kito alah mandi, badan barubah hanjo lai, tubuah nan kasa djadi aluih. Pamandangan barubah maso itu, sagalo nan gaib alah ka nampak. Usah tçan takajdjuik-kadjuik, ataupun gamang sasudah iko.”
Turunlah mareko maso itu, masuak kadalam talago, Pintjuran Puti bakatjim mandi, dalam aia tingkah batingkah, katjimpuang kaki babaleh dengan katjimpuang tangan, rami bunjinjo bak talempong.
Ado sabanta antaronjo. galaklah Puti Marintan aluih. galaknjo badarai-darai. “Bak mano parasaan tuan, apo pikiran tuan kini. tubuah
kito alah aluih. Djokok lalu urang disiko, kito nan indak nampak dek injo.”
18
