Sungguah takadjuik Marah Baganti, dilihek badan alah barubah, baniang sadjo bak tjando katjo, djaniah bak mato kutjiang. Batjampua heran djo tatjangang:
“Adiak kanduang Marintan Aluih, bak apo iko agaknjo badan, denai bak raso bajang-bajang, tagamang bana raso hati, raso malajang diudaro. Manolah adiak kanduang denai, tolong patjikkan badan denai!”
Kunun Puti Marintan Aluih, mandanga kato nan bak kian, riang hatinjo bukan main. “Usahlah tuan gamang bana, indak mangapo itu tuan, tjubo lihek itu dek tuan, arah kalua tabek nangko, lai kok ado tuan manampak, rumah gadang bususun-susun, lumbuang padi baliritan, djalan rami labuah nan golong.”
Alah mandjanguak Marah Baganti, malihek kalua tabek nantun. Nampaklah urang hilia mudiak, rami nan bukan alang-alang, barapo rumah gadang-gadang, rumah baatok idjuak, batatah baukiaukia, ukia bapilin aka tjino, rumah gondjong batatah timah, baandjuang bamego-mego.
“Heran bana denai mamandang, dari mano datangnjo nan banjak nangko, rami bana urang di siko, rantjak bana nagari nangko, kajo-kajo panduduaknjo.”
Bakato pulo Marintan Aluih, bakato sambia bakutjikak, “Manolah tuan djanjo denai, adopun nagari nangko, bukannjo datang kamudian, bukannjo turun dari langik, hanjo saukatu tuan batubuah kasa, indaklah djaleh dek mato kito. Katiko kito lalu dirimbo tjako, bukannjo lalu dirimbo rajo, hanjo malewek nagari djuo, hanjo indak nampak ulieh mato, karano kito batubuah kasa. Itu sababnjo mak, dilarang djokok lalu dirimbo rajo, muluik nan usah tadorong-dorong, kato nan usah talompek-lompek, karano rimbo ado paunjinjo.”
“Adiak denai Marintan Aluih, tagamang bana badan denai. Ba apo aka pado denai, djokok kito nak babaliak pulang, rusuahlah denai tantang nantun, santano tubuah indak namuah kasa lai.
20
