Alamaek ka laruik dagang sansai, alamek indak kabasuo korong kampuang, alamaik katingga tapian tampek mandi, ka baapo kolah kato mande!”
Galak badarai Marintan Aluih, kato badjawek djo garah sadjo.
Dek lamo lambek disanan, alah manudju kadalam kampuang, taruih sakali karumah mande.
Habih hari babilang pakan, bulan baganti dengan tahun, alah bamusim pulo disanan. Kunun di Marah Baganti, hati nan djauhdjauh sadjo, banjak tapikia maso itu.
Ado kapado suatu hari, malihek rupo damikian, bakato Puti Marintan Aluih: “Manolah Tuan djanjo denai, anak kito Mantjajo. Alam, gadangnjo bak dilambuak-lambuak, tinggi njo bak di djundjuang-djundjuang. Sananglah hati maso kini, tapi djaheknjo bukan alang kapalang, gilo batjakak tiok hari, indak ado kabakeh takuik, takato bana kabaraniannjo.”
“Adiak kanduang Marintan Aluih, anak kito ijo lah gadang, sadang elok kapamenan, buah hati limpo bakuruang, ubek djariah palarai damam, sidingin tampa dikapalo.”
Bakato pulo Marintan Aluih, bakato bahibo-hibo, “Hanjo sabuah nan taraso, Tuan nan indak sanang disiko. Mangapo Tuan rusuah sadjo, gilo bamanuang tiok hari, apo nan kurang pado kito? Djokok Tuan lai takana, jo didjandji nan dahulu, djokok indak samo ditjari ,nan ado samo dimakan, kalurah samo manurun, kabukik samo mandaki, sapantun aua dengan tabiang, sakik sanang bagi baduo, kan baitu djandji kito.”
“Mandanga kato nan bak kian, duduak tamanuang Marah Baganti, batambah laruik dalam hati,
“Adiak kanduang Marintan Aluih, mangopo adiak bakato bak nantun, denai nan balun barubah dari dahulu.”
22
