Galak tasanjum Marintan Aluih, lalu bakato njo lai, “Tuan denai dangakan malah, dek denai indak baitu, hibo Tuan rusuah didenai, sakik Tuan padiah di denai.
Djokok ijo Tuan nak babaliak pulang, malihek korong kampuang tuan, hanjo sabuah pinto denai, lakeh Tuan pulang kamari. Idjan lamo kami ditinggakan, tatjangguang malah anak kito, tagamang Mantjajo Alam siapo dek denai.”
“Djokok baitu kato adiak, sananglah hati mandangakan, djokok lai izin adiak, ijo denai nak malihek mande. Tapi bak mano denai ka pai, badan nan bak tjando iko, tubuah denai saaluih nangko.”
Hibo hatinjo Marintan Aluih, malihek kurenah Marah Baganti, roman baputuih aso sadjo,
“Tantangan ditubuah Tuan, buliah pulo dikasa kan baliak, tapi sabalun rasionjo denai katokan, badjandjilah Tuan pado denai, Tuan nan indak kamungkia djandi, kasiah Tuan indak kapupua, tjinto nan indak baubahi.”
Kunun Marah Baganti, taganang aia matonjo, djauh tahibo dalam hati, ramuak rasonjo paratian, kasiah dianak bukan kapalang, hibo rasonjo kabatjarai. Tapi taragak di mande indak tabado, nampak pudiang di halaman, tabajang pinang nan linggajunan, baitu djuo kawan samo gadang, sarato tapian tampaek mandi. Bakato bahibohibo, “Manolah adiak kanduang denai, dek denai indak baulang, saedaran gunuang marapi, salurah batang Bangkaweh, adiak surang nan tampek hati, mangapo di adiak baulang djuo. Ameh batampo indak kalantjuang, taanta katiang arasj, kabawah takasiak bulan, ka ateh ta ambun djantan.”
“Djokok lah baitu bana kato Tuan, sananglah pulo hati denai, denai lapeh djo hati sutji, sarato muko nan djaniah, denai lapeh djo doa pakauaran. Pailah Tuan turun babaruah, satibo Tuan di Tabek Patah, mandilah Tuan agak sabanta. Disanan tubuah mandjadi kasa. Tapi lakeh Tuan babaliak, mandi pulo di Pintjuran Puti, ditalago dibawah gunuang, amak aluih pulo badan Tuan.”
26
