Mandanga kato nan bak kian, heran tatjangang Marah Baganti, bakuak rasonjo kabuik dalam, tabukak pikiran maso itu. Dipaluaknjo Marintan Aluih, kasiah bapadu maso itu.
“Adiak kanduang Marintan Aluih, hibo rasonjo hati denai, akan batjarai djo anak kanduang, gampua rasonjo darah dagiang.
Hanjo sabuah pintak denai, karano badjalan djauh bana, bakato indak sadang sapatah, badjalan indak sadang salangkah, baiak ditjinto buruak, kok tibo santano malang badan denai, indak lakeh denai babaliak, ataupun tjilako nan manimpo, njao didalam tangan Allah.
Iko galang aka baha, nan diambiak dilaulik basa, bapaluik djo ula bidai, batuah nan bukan alang, tolong lakekkan katangan anak kito, pasangkan disebelah tangan kanannjo. Idjan talakekkan disabalah kida, tilakonjo tibo sakali, saribu siang saribu malam, kutuak mamakan maso itu. Tapi djokok lai kanai pasangnjo, Indaklah Injo talok dek basi, indak dimakan biso kawi, tahan tapo basidingkek, tahan putaliang badju basi. Ikolah pusako niniak denai, urang batuah hiduik-hiduik, patjik pitaruah adiak kanduang, amaknjo salamek anak kito.”
Mandanga kato Marah Baganti, sananglah hati Puti Marintan Aluih, lalu diambiaknjo galang nantun, dilatakkannjo dibawah banta, sambia bakato maso itu, “Manolah Tuan djanjo denai, pitaruan Tuan denai kanakan, indak ka lupo itu dek denai, dipatjik arek dibuhua mati.”
Kunun dimalam samalam nantun, sapitjiang indak talalokkan, gilo batjumbu djo bagurau, namonjo urang mudo-mudo, namonjo kasiah ka dibao ba jalan djauah, antah pabilo kabasuo lai, rantau djauah nan kadidjalang, barapo rimbo pasawangan,
Diambiak anak lalu didukuang, ditangisi Mantjajo Alam jo dek bapaknja Marah Baganti, hibo lah hati kasadonjo. saisi rumah nan gadang malihek kurenah bapak djo anaknjo, luluah rasonjo dalam
hati, sapantun katjo ditimpo batu, aia mato badarai darai,bak maniak putuih pangarang.
28
