dulang dibaliak bawak, indak urang nan bak awak".
Pakajan ijo tak kapalang, njato tjukuik salangkoknjo, tapi babadju tampak kulik, tubuah basaok mangko njato, batutuik baru kalihatan. Bakodek kain batiak haluih, takanak sampiang barendjeng, basusun banjak kakida, lutuik nan hilang2 timbua, tasingik tampak paruasan, djantuang batih parindu alam, namonjo urat batutuik, tapi sangadjo batampakkan. Sanggua nan gadang dek pangguluang, dadonjo kosong di alemu, tjaliak bak sirauik djatuah, pandang malewek kiri kanan. Malihek garak djo garik, kalatiak balabiah², bagai katjundang alu singkek, nan bak katjatiang baro bilah, bagai limpatiak kanai asam, bak limbua sapek muaro. Usah lai hambo rantang pandjang, sulihlah kito manjabuiknjo. Kan basuluah bagalanggang mato nan banjak, tampak dek kito nan basamo.
- Tjari nan lain tampat inggok
- Nan lai bapaham budi baso
- Bia buruak asa lai elok
- Kadjadi sumarak rumah tanggo.
Mandanga tjatjek djo bandingan, adok kadiri Limbak Tajo, dari Tuanku Biopari, tamanuang Datuak Andiko. Maraso malu dalam hati, lubuak nan dalam kaadjukan, nan bak andai kato adat:
- Dek paham kapalang tangguang
- Mabuak dek pandang salewai
- Lauik dalam pasia mangapuang
- Hari budjan karang tasangai.
Malu katubuah badan diri, awak tinggi lah urang andjuang, kok gadang lah urang ambak, kok pai kabarang batanjo, pulang katampat babarito. Kini tataruang di nan data, lah duo kali tampat djatuah, partamo di upek kamanakan, kaduo dibandiang rang sumando, walau dimuko tidak labia, dibatin hati lah seso, galisah insan dalam tubuah, kadiri malu nan labiah.
53
