Tantangan Datuak Andiko, mandarga rundiang tuanku, galak bagumam dalam hati, paham njo njato saukuran, dilahia baliau maundjuak kan, batin njo samo tak katudju. 'Hanjo dek tuanku mantjubonjo, tuanku baliau udji pulo. Udji maudji dalam dangkek, tjubo mantjubo pandapatan, manindjau paham masing2, kironjo samo pangadjian. Sabanta tjando tamanuang, rupo bapikia ijo bana, mantjari aka djo. budi, lalu mandjawab Datuak Andiko:
Kalau baitu kato tuanku
Babaliak kakato hambo tadi
Dek pandapek hinggo itu
Piliah tuanku hambo nanti.
Dalam batin hambo maukua
Patuik kan alah didjalankan
Tjaro adat batali tjambua
Samo bauntuak babagian.
Dek hambo bitjaro tamat
Balun lai tibo dinan djaniah
Budi djan didjadjah barat
Tuanku pulo lai mamiliah.
Hambo lah galap pamandangan
Tidak lai tampak nan katudju
Mano nan patuik kadjuduan.
Paham tasarah katuanku.
Tuanku tjubolah piliah
Tjarilah mano nan patuik
Nan kanjak bana kok lah buliah
Hambo kautang manuruik..
Habih rundiang Datuak Andiko
Mandjawab Tuanku Biopari
Duduak barundiang dek lah lamo.
Tjapek baliau bapambari..
61
