Baru Landjungan lah manjarah, sanang hati Datuak Andiko, suko Tuanku Biopari, kandak alah samo balaku, lah samo turuik manuruikkan, lah samo panuah runggo hati.
Landjungan lah suni kiro², tatjapai rasonjo angan², mungkin talihek rantau urang, tampan batambah pamandangan, pauleh aka djo budi, panukuak paham kiro².
Dalam dibimbang nan bak itu, sadang tatjapai nan saukua, nak sanang pulo dek Landjungan, bakato Datuak Andiko:
Kini baitu dek tuanku
Baiak dek Sutan Landjungan
Kandak lah samo balaku
Sakato kito maizinkan.
Tapi samantang pun baitu
Nan pikiran hati hambo
Isuak kadjadi panghulu
Talatak handak njo dimakam njo.
Usah bak rupo hambo pulo
Dek tangguang kapalang katjak
Dalam djaniah karuahnjo ado
Dek batanam bidjo tak masak.
Karantau Landjungan kito tulak
Lahia badagang baniago
Sambia mantjari ameh perak
Kadjilah adat djo limbago.
Itu pangana hambo sorang
Pikia tasarah katuanku
Usah tangguang mangupalang
Hasia handak njo nan duotu.
Kamano Landjungan kito suruah
Nak tantu izin kito bari
Walau hampia ataupun djauah
Asa tatjapai niat hati.
