Lah sudah hambo pikiri
Rasonjo tidak lai sio2
Kami malapeh sanang hati
Sadang elok pokok dibao.
Bapandai lah Landjungan
Mandjalankan pokok duo ribu
Ajah djo mamak mandoakan
Pulang djo ameh djo alemu.
Tapi samantang pun baitu
Rundiang habih kato nak sudah
Pabilo harinjo dek tuanku
Maso si bujuang kamalangkah.
Sudah rundiang Datuak Andiko, pokok saribu baundjuakan, Sutan Landjungan manarimo, antah suko antahnjo duko, takana rundiang nan lah sudah, kato lah dorong lompatan. Walau mamak lah tasalah, talansuang pabuatan nan daulu, patuik djuo awak manjabuik, luruih lupo manganakan, tapi djan salah talansuang, sampai manjingguang parasaan. Miki dek mamak tak mangapo, sabab nan bana nan mandatang, walaupun dari kamanakan, bago kok datang dinan ketek, nan kokoh tampat bagantuang, nan bana bakeh pitjajo, mandjawab Sutan Landjungan.
Ampunlah mamak dangan ajah
Sangadjo hambo kamari
Handak mamintak izin relah
Kinilah pokok nan dibari.
Kok kurang laweh tapak tangan
Djo niru hambo manampuaagnjo
Sjukur ka Tuhan diutjapkan
Kasiah rang tuo ditarimo.
Limbak nan dari nan bak kian
Nak sanang hati djo mato
Hari apo hambo badjalan
Sabab tudjuan dek lah njato.
