mamak rumah, namun untuk wadjib ditariak, nan baban dibao djuo.
Malah lah tantu nan marisau
Lah dapek samo dipikiakan
Kok ado pantangan nan talampau
Dek mamak pado kamanakan,
Kok hanjo tidak baitu
Patjah tak rago tatimpo
Ibarat sungai tak bahulu
Sulik mantjari muaro njo
Nak dapek samo dipikiakan
Supajo siang bak hari
Dek tuan elok lah lahiakan
Bajangan sabab kok lai njato.
Dek rundiang Tuanku Biopari, maraso Datuak Andiko, mandalam dibatin parasaan, pajah bapikia kamandjawab.
Lah sulik kamari antah, lah sendjang sagalo bedo, runtjiang kok kamari mantjutjuak, kok salah batuka samek, dalam salasai kusuik tibo, lauik kok karuah dek ikan, gunung kok hilang dek kabuik, hati dibatin bagisiran. Sambia maagak parundingan, mandjawab kato djan tadorong, lalu bakato Datuk Andiko.
Mano Tuanku Biopari
Kalau baitu buni tanjo
Tidak salisiah antaro kami
Hambo nan kanai dek bitjaro.
Mangko sibujuang nak badjalan
Ado dek injo nan maraso
Hambo nan djadi panjasalan
Hiduik dikampuang tak santuso.
Ditiliak kasawah ladang
Dipandang harato pusako
Sawah banjak makan tak sadang
Harato lah ditundjuak sadjo.
31
