Oi Nak kanduang sibiran tulang, kalau parangai nan bak nantun, itu pantangan niniak Anak, usah dipakai tu Nak kanduang, tambahan pulo oi Nak kanduang, kaba angin mandeh danga, antah iyo antah pun bukan, tumbuah di tangah alek jamu, paliang bapaliang panyambahan, lega balega pamulutan, bisia³. badasuih samo duduak, kijok bakijok samo kawan, tajam mato bukan kapalang, maliek salah si pangkalan.
Kalau apo-apo nan kurang, macam juadah ateh dulang, kok kurang agak sabuah, barapo garentang jo birunguik, jangang-jangang talingonyo, bak kabau jolong bacakau, barapo bulaliak jo bulalang mato, bak urang damam paneh, lalu tagak panyambahan, disuruah isi kasalahan, itu manantang paruik kanyang, itu mahadang minum pueh, sakali-sakali jan dipakaikan, lobo tamak tu namonyo, balabiah dari sapatuiknyo, banamo pi’i ancak-ancak.
Lambak nan daripado itu, nan mandeh danga-danga juo, balabiah jamba duo tigo, indak babaliak ka pangkalan, manjadi untuang pandapatan, disantap dimakan sajo, saketek indak bapabasokan, kubik bakubik samo kawan, barapo galak jo gareceh, cepak-cepong di kampuang urang, suko hati bukan kapalang.
Kalau baparangai nan bak kian, di mano adat limbagonyo, di mano tiru tuladannyo? Cubolah Anak pikia-pikia, Anak bamulo denai ajari, balun tahu adat limbago, balun mangaji cupak gantang, balun mangaji baso-basi, adokoh patuik nan bak kian, nan mandeh katokan tadi?
Takurang jamba agak sabuah, dimintaksalah silieknyo, kok balabiah jamba urang, tak diangkek pasambahan, dilamun sajo sambia galak, itu banamo cadiak buruak.
Pado pikiran hati denai, salah diundang nan salapan, sabab tak ado aratinyo, sumbang sajo kato denai.
Lorong kapado baso-basi, pihak dipi’i kalakuan, jan tapakai nan bak nantun, kok diliek pulo korong jo kampuangnyo, baiak pun
90
