nan sakaum nan sakaluargo, baiak di dalam nan sapayuang, atau di dalam nan saindu, indaklah ado samupakat, bak balam jo katitiran, sabuni sagayo indak, mangarehkan tuah surang-surang, surang hilia surang nak mudiak, pahamnyo ateh maatehi, atau nak labiah malabiahi, indaklah diam di nan bana.
Pado pikiran hati mandeh, pi’i parangai nan bak nantun, duo pakaro tampek salah, partamo dek nan mamakai, kaduo Pangulu kurang adia, sabab tahino di adatnyo, martabat lah tingga pulo, sabab indak bapaguruan.
Kok tumbuah silang jo salisiah, kalau duduak hukum mahukum, basiginyang nak marangkuah, basijilek nak mangabiah, basitagang urek lihia, tibo di mato dipiciangkan, hukum mahukum dalam kampuang, baiak di dalam nan Sapayuang, atau di dalam nan saindu, bauntuang bana dunia ko, jadi ibadat pado Allah, kamanangan dalam akhirat, libo di paruik dikampihkan. Kok pandai Anak malakukan, basuruah sapanjang kitab Allah.
Sabagai pulo oi Nak kanduang, himbau biaso basahuiki, panggia biaso bahadiri, kok tumbuah anak kanai saru, masuak panggilan alek urang, makan dahulu agak kanyang, minum sakirokiro pueh, sabab di dalam alek jamu, minum jo makannyo bataratik, duduak tagak bajangkokan, sinan bapakai baso-basi, ereng gendeng tak buliah tingga, baok taratik sopan santun, jan lupo di sarat rukun, siriah manyi- riah kampia rokok.
Kutiko sambah manyambah, jan lalu lalang sajo, muluik manih budinyo haluih, bakato manuju bana, sarato baso jo basinyo, maliek ereng gendeng urang, barundiang maambiak bawah, bakato marandah-randah, duduak baselo baiak-baiak, hawo jo nafsu dipadami.
Pangulu duduak jo adatnyo, mambincang adat jo limbago, sarato suriah dangan barih, kok lawik indak baombak, kok padang indak ba angin, tatap alemu dalam dado, pituah guru kana juo, itu
92
