Baralek Gadang
DEK takadia Allah, diagak-agak dek Sutan Samparano, lah dibilang-bilang hari, lah dietong pakan jo bulan, sampailah garan tigo bulan, lah tibo janji mandeh kanduang, dangan Tuanku Bijaksano, pado ukuran jo jangkonyo, bakatolah Sutan Samparano,
“Manolah Mandeh kanduang den, pado pikiran denai surang, lah patuik Mandeh basugiro, maansua-ansua jo bakameh.” Manjawab Siti Juhari, “Kok lah baitu janyo Anak, denai indak lupo tantang itu, kajang alah samia lah cukuik, pabilo hari kan badayuang, indaklah susah malahiakan, hanyo sabuah mukasuik denai, manuruik sapanjang adat, Anak kanduang alah gadang, alah elok bapakaian, alah patuik jadi Pangulu.
Samantaro denai lai hiduik, buyuang dijadikan Pangulu, samo baalek kito sakali, samo jo Siti Budiman, bahimpok camuak jo pageh, adat nan samo kito pakai.
Nan sakarang kini nangko, panggialah niniak mamak kito, panggialah Pangulu di nagari, sarato urang ampek jinih, Imam-Chatib-Bilal-Maulana, baiakpun anak kamanakan, laki-laki jo parampuan, panggia nan sisiak palapahkan, surang nan indak buliah tingga.”
96
