Manjawab Sutan Samparano, “Kok lah baitu kato Mandeh, denai junjuang di ateh kapalo, denai pikua di ateh bahu, bajalan denai kini-kini, sadiolah Mandeh tangah rumah,” lalu dilapeh saru panggia, nan bak pisuruah mandeh kanduang, surang pun indak ditinggakan.
Lah tibo pulo wakatunyo, tibolah alek tangah rumah, lah datang Pakiah Candokio, sarato ulua jo hantanyo, lah kawin Siti Budiman dangan Pakiah Candokio, bak katidiang jo lanjuangnyo, bak dulang jo taduang saji, sudah salamaik 64 samparono.
Bakato Siti Juhari, kapado jamu karapatan, “Manolah Datuak niniak mamak, atau Pangulu jo Andiko, sarapek papek Nan Ampek Jinih, Imam-Chatib-Bilal-Maulana, baiak Dubalang jo Ampang Limo, pihak di niat nazar ambo, aluran tantang Siti Budiman, alah salamaik tu kironyo dangan Pakiah Candokio.
Sabuah lai nan taraso, pihak Sutan Samparano, kok aka alah satunjuak, pikiran alah sarueh, budi bicaro lah samiang, pangajian lai salampih, kok balun kasamo jo nan banyak, tapi lai taturuik di balakang.
Hanyo saketek nan marusuah, suku balun lai balantak, galanggang balun dipacah, rumah balun batungganai, kampuangnyo balun bapatuo, inyo balun bapusako, nan sahinggo iko naiak, tagaknyo nak jan tasundak, malenggang nak jan tapampeh, Si Buyuang Sutan Samparano, kito jadikanlah inyo Pangulu, itu mukasuik badan diri, amak dipulangkan pado karapatan.”
Mandanga kato nan bak kian, manyahuik rapek nan banyak, “Kalau baitu janyo Mandeh, dek kami lah taagak pulo, kok di Sutan Samparano, panjang bak raso ka bakarek, singkek bak raso ka bauleh, kami nan rapek tangah alek, samupakat sajo kasamonyo, bak papatah urang tuo, sakali marangkuah dayuang, duo tigo pulau talampaui, sakali mambukak puro, ampek limo utang tabayia, hanyo nan gala pusakonyo, mandeh tarangkan malah pado kami.”
98
