Manjawab Siti Juhari, “Kok itu rapek tanyokan, tantangan gala pusakonyo, diwarih nan ambo jawek, pusako nan ambo tolong, pusakonyo nan ka dibangun, gala nan ambo barikan, Datuak Naraco Lauik Budi.
Kok panjang nan bakaratan, kok gadang nan basibiran, atau kok bunta nan bakapiang, kami bak pinang dibalah duo, di nagari Taluak Tandiang Koto Ulak, lingkuangan barih di Kampuang Bayang, leh sampai ado pusako di sanan, Datuak Naraco Bungka Samo,” itu sambahan Siti Juhari.
Manjawab urang nan banyak, “Malah bak itu kato Mandeh, maklumlah kami kasadonyo, bak papatah Mandeh juo, janiahlah bak mato kuciang, datalah bak lantai papan, haluih lah bak dindiang camin, kami lewakan gala nantun, nak musahua kiri jo kanan, nak tahu urang hilia jo mudiak.”
Musyawarah di tangan alek, lah sakato lah samupakat, tagak badiri Ampang Limo, bagala Gagok Panjang Pikia, urang nan baiak di nagari, sampai ado sumpah satianyo, dibaconyo pulo biso kawi, sagalo nan rapek pun maiyokan, samo dibaruikkan tangan ka muko, manarimo suko kasamonyo. Sudah salasai nan bak kian, jamba batatiang hanyo lai, lah sudah minum jo makan, hari patang alek pun turun, marapulai lai tingga di rumahnyo, Allahurabbi gadang hati, padomaso dewaso nantun.
100
