Manjadi Pangulu
HABIH hari baganti pakan, lapeh pakan bulan lah timbua, sampai sabulan duo bulan, hujan taduah kabuik lah tarang, disalisiak sayok hanyo lai, dikirai tiok halai bulu.
Pihak di mandeh Siti Juhari, kok lah manjadi Pangulu, baaka lai saketek, babudi lai saambun, kok mangaji alah pandai, bakato lidahnyo panjang, tapi bak unggeh elok buni, buni bak buni batang padi, alemu balun diputusi, paham balun basudahi, lalu dihimbau anak kanduang.
“Manolah Buyuang janyo denai, Datuak Naraco Lauik Budi, marilah ka niak kito duduak, elok-eloklah karuntuangan, nak mandeh lapeh tangguak rapek, awak lah jadi urang tuo, lah Pangulu janyo urang, himaik-himaik mangapuangkan, barang nan titiak pado mandeh.”
Mandanga kato nan bak kian, manjawab Datuak Naraco, “Kalau baitu janyo Mandeh, nak denai pacik arek-arek, denai pagang taguah-taguah.”
Agaklah di Siti Juhari, rundiangan ka lua hanyo lai, “Manolah Anak kanduang denai, kito putusilah alemu nangko, sarato paham nan ditunjuak.
102
