Kato nantun ampek parkaro, Partamo tahu pado awak Kaduo tahu pado urang Katigo tahu pado alam Kaampek tahu pado Tuhan. Adopun nan paham kato, iyolah ampek pulo parkaronyo, Partamo wakatu bungo kambang Kaduo wakatu angin lunak Katigo wakatu antaronyo Kaampek wakatu tampek tumbuah. Nan salapan mandeh pacah, takunci dalam duo tampek, kalau tasangkuik di nan tinggi, kalau talatak di nan gadang, kok himaik Anak manaruahkan, alah salamaik ateh dunia, lalu sampai ka akhirat, insyaAllah indak binaso.” Mandanga kato nan bak kian, manjawab Datuak Naraco, “Manolah Mandeh kanduang ambo, lorong pituah Mandeh nantun, kok buni alah denai danga, kok rupo alah denai liek, nak baujuang nak bapangka, nak baawa nak baakhia, nak jan tasalah lahia batin, tarangkan juo malah di Mandeh.” Manjawab Siti Juhari, “Manolah Anak kanduang den, caricarilah pahamnyo, timbang-timbanglah aratinyo, himpunlah alam saisinyo, mupakat badan surang diri, kok dapek di dalam pikiran, gadang bana paedahnyo, tampeknyo buliah denai katokan, danga banalah di Nak kanduang, malalukan nan salapan nantun. Hari sahari dipatigo, malam samalam diparampek, agak agiahkan jo alemu, buliah denai uji kapandaian, jan mangaji di nan mudah, eloklah diaja di nan sakik, cubo bamanuang sungguahsungguah, unjuak mamintak pado Allah. Kok hanyo balun bak itu, elok diaja mandeh juo, bak mandi di dalam cupak, daki banyak ayia lah habih, ka mano Anak ka
104
