“Pueh-pueh dek mangapuang, pasai-pasai dek mamiliiah, habih dayo baban talatak, tibo paham aka baranti, kato putuih sandirinyo, indak manduo cito lai.
Jikok dayo balun habih, jikok paham balun tibo, cito banyak parisau ragu, budi manunggu ka ilmu, paham babisiak dalam hati. Basikolo anggak kanai, basijompo nak manganai, basisuruik lalu kanai, hawa jo nafsu basalahan, budi bapantang katinjauan, paham bapantang kamaliangan. Kaluah kasah papeh nan ampek, sarato anggoto katujuahnyo, panco indro manangguangkan, batang tubuah marasoi.
Paham insaf paham nan haniang, paham sangko cindorong hati, paham syak baisi antah, paham waham mambaok lalai, paham yakin ilmu tatap, ujuik satu pangana bunta. Tanang itu saribu aka, dalam saba bana mandatang, himaik-himaik didahulukan, bahimaik-himaik kamudian.
Paham arif balawan banyak, paham cadiak manganai surang, paham mantiak mangunyah bangkai, bijaksano tahu dirasam. Candokio pandai malulua, biopari pantun ibarat, jauhari tahu manikam, budiman mati di katonyo.
Sidiak di hati, muluik maatuakan. Nyato adat di ateh tumbuah, nyato pusako bagiliran, limbago sipat mananti, undang-undang maisi kandak, cupak sitilago panuah, gantang simajo lelo.
“Oi, Nak kanduang sibiran tulang, kalau tapiliah nan banyak nantun, lah tantu umpek jo tampuaknyo, lah dapek dek Anak malalukan. Lah umpamo tungku tigo, api mukasuik kan dimasak. Kalau alah hasia lado garam, indak mungkin tu, Nak kanduang.
Sadangkan Mandeh parampuan, indak tagamang saketek juo. Kok sampik elok patenggangkan, kok lincia mudah pagantuangkan. Kok Anak jawek warih Mandeh, awak lai laki-laki pulo, nanti sajo takadia Allah. Mudah-mudahan umur kok panjang, ado karunia Tuhan kito, samo kito liek kasudahannyo.”
110
