Mampaturuikkan Hati Gadang
Ambo karangkan kaba mandeh, nan banamo Siti Juhari, anak rang Taluak Kiro-kiro, di dalam kampuang Medan Budi, anak Tuanku Rajo Bana.
Lorong kapado Siti Juhari, dek pandai kuaik baguru, dek tahu kuaik batanyo, kuaik mandanga patuturan, gaduang aka lauik bicaro, tahu mudaraik jo mupakat, tahu di akhia pakarajaan, tahu di karang nan manonggok, tahu di hino jo mulia, pandai mangaji baso-basi.
Namun bapaknyo urang usali, lalu ka anak rintiak juo, pituah arek mangganggamkan, papatah taguah mamacik-kan, salah saketek indak kayo, nan indak sampai manyampai, nan balun sadang manyadang, bapadi sapangga tahun, bareh indak sampai ka dimakan.
Anak baduo bagai balam, sikua jantan sikua batino, nan tuo Si Buyuang Geleng, nan bungsu Siti Budiman.
Dek lamo bakalamoan, lah gadang Si Buyuang Geleng, maliek tampan jo pakarati, maliek macam kurenahnyo, patuik anak dibari gala, bagala Rancak di Labuah.
Pi’ilakunyo paja nantun, susah bana manyabuiknyo, nan indak tahu diuntuang, bahati gadang tiok hari, indak takana labo jo rugi, urang ka ladang inyo bamain, ka sawah lai adang-adang, nan labiah baambuang sipak rago, gilo malapeh layang-layang.
2
