Cilako Mudo jo Cilako Tuo
ADOLAH pado suatu hari, mahimbau pulo hanyo lai, iyo mandeh Siti Juhari, kapado anak nan baduo.
“Manolah anak Datuak Naraco Lauik Budi, sarato Si Upiak Siti Budiman, darah sagumpa mandeh kanduang, marilah kalian kaduonyo, nak takasiak nan talunai, takarak tabatu ampa, nak tasuriah bak mambajak, nak tatukuai jajak mandaki, diusai bana pangajian, nak denai kaji cilako mudo.
Jikok ado umua panjang, kok sampai kalian tuo-tuo, ajakan kapado anak cucu, atau kapado korong kampuang, atau kapado rang sumando, kan ganti siriah nan sakapua, kan ganti pinang nan sagatok.
Awak kok banyak mintak tolong, banyak manyuruah manyarayo, japuiketan balikan inyak, ganti pambaleh-baleh guno. Kini dimulai pulo mangaji, simaklah bana dikalian, piliahi bana habihhabih, cilako mudo denai katokan, adolah tigo pakaronyo:
Partamo banamo mudo parisau
Kaduo banamo mudo pangusau
Katigo banamo mudo langkisau.
Adopun arati ‘mudo parisau’, siang malam bahati rindu,patang-patang bahati rembang, balun dihimbau lah babuni, balun
120
