dikubik inyo lah datang, balun dijujai inyo lah galak, bak katidiang tangga bingkainyo, bak payuang tabukak kasau, pahamnyo kambiang di ulek, sabab dek canuak angan-angan, itulah nan mudo cilako.
Arati ‘mudo nan pangusau’, ingeklah pantun rang tuo- tuo,
Cincin perak duo parmato
Cincin tambago bakilatang;
Lah ribuik sapanuah kato
Adat rang mudo kasabutan.
Hilia mudiak inyo manyusah, kiri kanan mamacah parang, dari jorong sapanuah jorong, dari kampuang sapanjang kampuang, barang tarupai nak mahelo, apo nan tampak nak manariak, inyo nak iyo kasamonyo, kok mamintak indak dangan suko, mambali indak jo harago, bak balam tabang randah, ayam di lasuang tasambuba, itulah mudo nan cilako, sabab dimabuak uweh-uweh.
Nan banamo ‘mudo langkisau’, itulah mudo lidah ayia, sapantun talingo angin, labuah sampik kudo panyipak, arang kareh lari manyimpang, ikua kupik kapalo randah, jangek taba ajaran kurang, aka busuak itikad jahek, paham tak suko ka nan baiak, manaruah dangki jo khianat, itulah mudo nan cilako, sabab takabua dalam hati.
Manolah Nak kanduang nan baduo, cilako mudo lah denai sabuik, dangakan juo dek kalian, denai kaji cilako tuo, itu tigo pakaronyo juo:
Partamo nyinyia tak manantu
Kaduo damuik badak jantan
Katigo riang-riang asam.
Arati ‘nyinyia tak manantu’, bak balam talampau jinak, maangguak-angguak tabuang ayia, pancotok kili-kilinyo, dimabuak kecek lumak lamiak, rundiang bak sarasah tajun, indak mambari pangajaran, kato bak buni gunuang runtuah, indak nasihat jo umanaik, batutua baolok-olok, manyimpang mato bisua urang, itulah
122
