Kuniang bak siriah rareh
Indak takana tampuak layua.
Padi dilandang parumpatan
Batang salibu nan dikisai;
Hati gadang anak paturuikkan
Indak dikana mandeh sansai.
Ikolah jinih untuang denai, sabab dek kayo lah mangalupak, hiduik bak cando induak ayam, mangakeh mangko mancotok, tapaklah mipih dek manggaleh, adang makan adang indak.
Caliak dek Anak badan denai, dek mamikia-mikia juo, jangeklah bak jangek pari, tubuah lah masiak dek katidiang, kaki naiak kapalo turun, kok tumbuah badan sakik-sakik, lah mati sajo kalaparan.
Mandanga kato nan bak kian, manjawab Rancak di Labuah,
“Dangakan malah Mandeh kanduang, bak kato pantun rang tuo-tuo:
Manduduik makan tambakau
Tiuik tambakau lai sapinang;
Antaro ikuik kan dikusaui
Sabalum nyawo badan hilang.
Manduo kudo diracak
Bari batali palanonyo;
Maso mudo dunia dikacak
Malah tuo apo gunonyo?”
Mandanga kato nan bak kian, manjawab Siti Juhari, “Pikia pandapek di hati anak, indak surang sarancak awak, sarupo pangulu jo manti, sabagai Jaksa juru tulih, angkuah sarupo lareh-lareh.
Pikia pandapek hati denai, kok batamu urang di jalan, indaklah inyo ka batanyo, urang lah tahu kasadonyo, disansai untuang badan denai, tunduak tapakua urang nantun.
Kalau anak tabalakang, indak tabedo cibia urang, indak tatangguang kacimuihnyo, papek lidahnyo dek babincang, pendek
8
