hiduang jo bibianyo, dek mancibiakan Anak kanduang. Oi buyuang Rancak di Labuah, pado pikiran hati denai, dibali pakaian sadang elok, nan tak mancando Buyuang pakai, sukolah denai mamandangi, kok paruik mandeh tak baisi, alah takadia pado Allah, indak karano gaduak awak, indak karano geneng diri. Bak kato anak cako, samantaro hiduik kan dikusau, sabalum nyawo badan hilang, itu nan mandeh saru-saru, siang manjadi anganangan, malam manjadi buah mimpi. Tapi samantangpun baitu, mako sanang hati denai, kok padi lah sampai ka dimakan, lah duduak denai jo sukatan, baoklah kawan duo tigo, buliah denai tanak bareh putiah, diragamkan gulai ampek limo, macam juadah dipabanyak, bak itu mako salarian, alah dirasuak manjariau, alah dikasau lakek atok,” katonyo Siti Juhari. Manyahuik Rancak di Labuah, “Kok baitu kato Mandeh, kularaik malah badan nangko, kan sansai malah badan den, indak tacaliak muko urang, indak tacaliak samo gadang. Indak koh Mandeh marasoi, samaso Mandeh mudo matah? Caliak dek mandeh tangah labuah, sairiang inyo ampek limo, sarantak sajo pajalanan, mandaram bunyi sipatunyo, samo sajo palangkahan, bak Ulando pulang barih.” Manjawab Siti Juhari, “Oi Nak kanduang sibiran tulang, indak mandeh maambek bana, kok lah baitu nan ka elok, kok lah baitu nan katuju, usah diguluik digalonsang: Rang Salo nak di Salanjo Rami galanggang nak rang Magek; Rang kayo nak dikayonyo Nan miskin ansua basilambek. Sabagai pulo, oi nak kanduang, kok Anak tak bapancarian, cubolah Anak pikia-pikia, habih sipatu nan sapasang, hancua pakaian nan sapatagak, patuik diganti jo nan lain, di mano dapek ka pambali?
10
