Dipikia bana di dalam hati, dihabihkan malu jo sopan, lalu dijalang mandeh kanduang, disusun jari nan sapuluah, dihunjamkan lutuik nan duo, ditakuakan kapalo nan satu, nanyambah ka mandeh kanduang, “Ampunlah ambo Mandeh kanduang, iyo basuo kato Mandeh, saketek indak nan baubah, kinilah mangko tapareso, lah sampik angok dek utang, urang manunggu tak baranti, lalok nan indak talalokkan, wakatu lapa indak namuah makan, lah sasak alam tampek diam, indak babumi bakeh tagak. Nan sahinggo iko kaateh, nak den ubah malah parangai, nak ambo aliah kalakuan, dipacik taguah kato Mandeh. den junjuang titah Mandeh, pangaja Mandeh den turuik, bayia dek Mandeh utang den.” Mandanga kato nan bak kian, manyahuik Siti Juhari, “Oi anak den Rancak di Labuah, usah mangadu pado mandeh, samantaro anak lai mudo, elok dikusau dunia nangko, cubo banalah dahulu, habihkan bana aka budi, bak pantun rang tuo-tuo, Sajak samulo denai katokan, Indak dilatak dalam hati, Pandan jo banto maladuangkan, Sajak samulo denai katokan, Indak dilatak di dalam hati, Badan anak juo manangguangkan.” Manyahuik Rancak di Labuah, “Mandeh kanduang ampuni denai, tapuak tampalah dek Mandeh, amun makilah dek Mandeh, sabab pi’i denai lah talampau, tingkah den lah tadorong. Ambo mintak juo pado Mandeh, sasek namuah den suruik, salah namuah den tobat, asa utang Mandeh bayia, nan sahinggo iko kaateh, aden basumpah pado Allah, indak ka ancak-ancak juo, hanyo ikara jo lidah, den manuruik kato Mandeh.” Mandanga kato anak kanduang, agaklah Siti Juhari, namonyo urang lapang alam, taraso iyo dalam hati, banyak pikiran nan mandatang, anak pun surang laki-laki, kok talaruik paratiannyo, tantu marusak kasudahannyo, lalu bakato hanyo lai, “Oi anak den Rancak di Labuah,
16
