Maaliah Gala
DEK LAMO bakalamoan, pihak Si Rancak di Labuah alah barubah paratian, lah takana dinan bana, lah labiah susah daripado sanang, lah labiah jago daripado tidua, lah biaso duko pado suko, musin ka sawah lah ka sawah, musin ka ladang lah ka ladang, urang manggaleh inyo manggaleh, lah namuah basusah payah, namuah bak urang bak awak, pandai bajojo baniago, lah baladang lah bahuma, pandai maniru manuladan, namuah mancontoh kabaiakan, kuaik baguru ka nan pandai, kuaik batanyo ka nan tahu, suko barundiang jo nan tuo. Kok di sawah jo di ladang, ditanam sagalo rupo, tanaman tuo pun lah banyak, tanaman mudo ado pulo, lah babantiang duo tigo, lai baitiak baayam, lah tahu mangana Allah, indaknyo lupo di miskinnyo, barakaik ujuiknyo mamintak, Allah manolong kapadonyo. Lah tampak pambarian Tuhan, dalam satahun panangalan, pisang badukuang ditandannyo, tabu lah manyintak rueh, jaguang lah mahampai suto, taruang lah ayun-ayunan, lado lah mambintang timua, kacang lah taji-tajian, antimun mangarang bungo, labu lah marantang tali, lah masak padi di sawah, lah kuniang padi di ladang, jariah jo payah lah baguno, dapek rasaki maso nantun, barapo dapek dibarikan ka mandeh kanduangnyo.
20
