Nak denai urak si Tambo Lamo, buhua di dalam kabek pinggang, latak di dalam kiro-kiro, taruah banta kalang ulu, indak urang rancak dirancaknyo, indak urang elok dieloknyo. Jikok nan merah iyolah sago Kalau nan kuriak iyolah kundi; Jikok nan indah iyolah baso Kalau nan baiak iyolah budi. Dangakan bana malah di Buyuang, nak pandai Anak amalkan, alemu padi nan ka dipakai, makin baisi makin tunduak, marandah diri dari kawan, urang nan tuo dimuliakan. Kalau sairiang jo nan tuo, usah langkahnyo dilampaui, iriangkan sajo di balakang, kalau tagageh Anak kanduang, mintaklah maaf nak dahulu, jikok makan jo nan tuo, usah dahulu basuah tangan, baitu pulo alah makan, nanti dahulu nan tuo-tuo, baru Buyuang mambasuah tangan. Oi nak kanduang sibiran tulang, taratik makan denai katokan, dalam makan usah mancangkuang, duduak baselo baiak-baiak, suok nan jan di pagadang, capak nan usah dipakareh, jan mangecek sadang makan, makan usah dipabanyak. Kok makan bakawan-kawan, kalau dahulu Anak kanduang sudah, dimintak izin pado kawan, baok ka muko tampek basuah, tangan nan usah dicampuangkan, tuang ka pinggan tampek makan, mangucap syukur basilambek, jari nan jan takalatiak. Kalau lai nan bak kian, lah tampak tando alamatnyo, tandonyo awak rang baiak, lah batunjuak baajari. Oi anak den Rancak di Labuah, kok takana nak bamain, nak balapeh-lapeh lalah, kok manyewo bendi urang, ubah taratik nan dahulu, janlah lupo dipangaja, ingek tunggua kan manaruang, pandanglah rantiang kan mancuek, caliaklah duri kan mangaik, tangan nan jan disampangkan, caliak nan usah dipatinggi, pandanglah urang lalu linteh, nan patuik Buyuang tagua sapo.
26
