Rapeklah kaum kaluargo, himpunlah anak kamanakan, sarato ibu jo bapak, panggia Pangulu dalam kampuang, himbau Pangulu dalam nagari, rapekkan tolan jo sahabat, nak kito lapehkan niat kito.”
Manyahuik Rancak di Labuah, “Kok lah baitu kato Mandeh, den tarimo jo suko hati.”
Lamo sabanta antaronyo, lah hasia sado nan paguno, alek dipanggia hanyo lai, lah sampai ukua jo jangkonyo, lah duduak alek tangah rumah, tibo sambahan Siti Juhari, pado Pangulu dalam kampuang, sarato nan rapek kasadonyo.
“Manolah Miniak Mamak ambo, ambo baniat dalam hati, handak maaliah gala anak, nan banamo Si Buyuang Geleng, bagala Rancak di Labuah, kito aliahkan galanyo kini, dangan gala Sutan Samparano, handak tarangkan tangah alek, buliah masahua dek nan banyak.”
Manjawab Pangulu dalam kampuang, sarato rapek nan banyak nantun, “Kok lah baitu kato Mandeh, Insya Allah baiaklah itu.”
Ado sabanta antaronyo, musyawarahlah di tangah alek, urang di dalam alek nantun, alah mandanga kasadonyo, Rancak di Labuah dahulunyo, kini bagala Sutan Samparano. Alek sudah hari lah patang, patang bajawek dangan sanjo, sanjo bajawek dangan malam, lampu tasalai hanyo lai.
Kununlah Sutan Samparano, lah barubah sajo kalakuan, baaliah sajo parangainyo, tandonyo lakek pangajaran, urang nan tuo dipamulia, urang nan gadang dibasokan, nan mudo urang dikasihi, nan bak pituah mandeh kanduang, saketek indak diubahi.
Urang nan banyak di nagari
Bahati sayang kasadonyo;
Banyak baniat dalam hati
Handak manjapuik ka sumando.
30
