LAMO sabanta antaronyo, takana pulo dek mandehnyo, dipandang anak alah gadang, nan banamo Siti Budiman. lah patuik pulo bajunjuangan, lalu bakato hanyo lai,
“Oi anak den Sutan Samparano, agak ka mari Anak duduak, kito barundiang-rundiang haluih, kito babisiak-bisiak ketek, ado sabuah nan marusuah, adiak anak Siti Budiman, lah gadang tampak di mato den, lah patuik inyo basuami. Caliak-caliaklah dek Anak, cubolah pandangandang bana, nan elok ka manjadi urang sumando.”
Manyahuik Sutan Samparano, “Malah bak itu kato Mandeh, ambo pikiakanlah dahulu, duo hari ganok ka tigo, amak den tiliak-tiliak bana, nan patuik ka judu adiak den.”
Bakato Siti Juhari, “Jikok dapek nan sasuai, lakehlah mandeh bari tahu.”
Sampailah pulo tigo hari, lalu dijalang mandeh kanduang, bakato Sutan Samparano, “Manolah Mandeh kanduang den, nan Mandeh suruah cari-cari, nan Mandeh suruah pandang-pandang, nan kajudu di adiak den, iyolah Sutan Malabiahi, anak Tuanku Kareh Hati.
Kalau dikaji katampanannyo, lansianyo bak mansiang parik, payuaknyo bak langgun di rombok, lamahnyo bak pimpiang di lereng,
32
