muko nan bagai bulan panuah, pancaliak an palito padam, pakai sipatu tiok hari, mamakai bendi hilia mudiak, badatak bunyi cambuiknyo, pambari tahu urang banyak. Pado pikiran hati den, raso sasuai jo si Upiak, lah patuik judu adiak kanduang, itu pandapek ambo surang, maklum pulang pado Mandeh, salah banakan lah dek Mandeh, elok buruakkanlah dek Mandeh.” Mandanga kato nan bak kian, bakato Siti Juhari, “Manolah anak Sutan Samparano, Jikok nan merah iyolah sago, Kalau nan kuriak iyolah kundi, Jikok nan elok iyolah baso, Kalau nan baiak iyolah budi. Babelok bapilin-pilin, Babelok ka Batang Hari, Dielok urang tak ingin, Budi baiak nan kito cari. Tantangan Sutan Malabiahi, kok elok bana ruponyo, kok rancak bana pakaiannyo, dunianyo sunyi di pangaja, alamnyo rami kacampuran. Sudah diliek dipandangi, kok duduak inyo ateh bendi, tangan tasampang ditapinyo, caliaknyo mamanah langik hijau, geleng kapalo bak sipatuang, banyak nan tuo urang lalu, indak inyo mambari salam, kalau bajalan tangah labuah, bak ayam kuriak panjang ikua, indak kurang pancaliak diri, tampan maukua bayang-bayang. Pado pikiran hati mandeh, elok nan lain Anak cari, usah dipakai pandang mato, tiliak jo hati pamanuangkan, denai bari janji tigo hari, sapakaik hati jo mato Anak, kato- kan malah pado denai.” Manyahuik Sutan Samparano, “Jikok baitu kato Mandeh, nak den pikia bana-bana, sabalah Mandeh dahulu.”
34
