Sampai pulo garangan tigo hari, lah datang Sutan Samparano, manapek-i janji jo mandehnyo, bakato Sutan Samparano, “Manolah mandeh kanduang den, dalam pikiran hati den, nan patuik junjuangan adiak kanduang, iyolah Ampang Limo Garang. Lorong kapado romannyo, indaklah ado salah siliaknyo, lai barani janyo urang, di dalam kampuang satumpuak iko, tampek sagan di urang banyak, raso katuju dek adiak den, maklum pulang pado Mandeh.” Manyahuik Siti Juhari, “Manolah anak Sutan Samparano, kok hanyo Ampang Limo Garang, indak denai namuah tu nak kanduang, sajak di niniak muyang kito, indak adat balun limbago, indak warih sarupo itu, manarimo sumbarang urang, gadang bana mularaikyo. Tantangan Ampangan Limo Garang, lakunyo bak musang jantan, tidua siang bajago malam, kok takuik urang pado lahia, di batin upek baribu ratuih, hino saameh limo kupang, ameh dicampua jo nan karun, padi disisiak jo hilalang, dunia akhirat kito binaso,” Manjawab Sutan Samparano, “Kalau baitu kato Mandeh, cubolah Mandeh cari pulo, cubolah Mandeh timbang-timbang, nak den cari aka budi.” Bakato Siti Juhari, “Oi Buyuang Sutan Samparano, habihkan bana pandai Anak, cubokan bana pandapek Anak, nambek kalah parang sajamang, badia salatuih duo latuih, kok sampai tigo kali tembak, kalau indak juo manganai, di sanan mako Anak suruik, cubolah cari sakali lai, den tambah janji tigo hari.” Manjawab Sutan Samparano, “Kok lah baitu kato Mandeh, nak den cubo sakali lai, maklum pulang pado Mandeh juo.” Di dalam hari nan tigo hari, iyo di Sutan Samparano, lah dapek pulo nan katuju, lalu dijalang Mandeh kanduang, bakato Sutan Samparano, “Manolah Mandeh kanduang den, sampai sakali duo kali, tembak katigo panyudahi, pado pikiran ambo surang, nan patuik ka junjuangan adiak kanduang, ado surang nan lai tangkeh, bagala Bagindo Capek Lago.
36
