Kalau ditiliak pado romannyo, atau kapado pakaiannyo, sarupo Sutan Malabiahi, patuik ka jodoh adiak kanduang.”
Manjawab Siti Juhari, “Kalau baitu pikiran Anak, indak denai namuah tu Nak kanduang, kalau Bagindo Capek Lago, tinggi lonjak gadang galapua, lagonyo di bawah sajo, tak tahu di baso-basi.
Samo den liek den pandangi, barundiang inyo jo nan tuo, katonyo lalu-lalang sajo, saketek indak basantaho, kato nan tuo taknyo turuik, pangaja nan pandai taknyo danga, indak maikuik kato nan bana, inyo kuaik di tulangnyo sajo, indak mangaji salah bana, gadang damuik barek bibia, walau Pangulu nan datang, inyo nan indak maacuahkan, itu pantangan denai bana.
Kampuang kito nan kan langang, siapo urang nan ka datang? Ayam pun indak nan ka naiak, antahkoh Bagindo surang duduak tagak, bak baruak bapauik, kan malapuak lantai sajo,” katonyo Siti Juhari.
Mandanga kato nan bak kian, manjawab Sutan Samparano, “Manolah mandeh kanduang den, ka mari indak kan baiak, ka sanan indak kan elok, habihlah tenggang budi den, eloklah Mandeh manunjuakkan, mano nan baiak ka diambiak, amak den cari aka budi.”
Bakato Siti Juhari, “Malah baitu kato Anak, pado pikiran hati denai, alah denai pikia habih-habih, lah denai tungkuik tilantangkan, denai timbang buruak jo baiaknyo, atau mularaik mupakatnyo, nan patuik jadi minantu, ka ganti niniak mamak kito, nan ka judu adiak anak, iyolah hanyo si Buyuang Sidiak, bagala Pakih Candokio, anak Tuanku Bijaksano, kamanakan dek Datuak Rajo Adia, itu di mandeh nan katuju.
Kalau diuji samo merah, jikok ditayia samo barek, sajudu gala jo lakunyo, saedaran bumi jo langiknyo.
Cubolah anak panciang-panciang, kalau batamu jo urang nantun, jan dikabek-kabek bana, marusuak jalan Buyuang lalu, manyereang mangkonyo tibo, samo suko mangko manjadi.
38
