Usah baguluik bagalusang, jan bagageh Anak kanduang, bia lambek asa salamaik, indak lari gunuang dikaja, namun takadia pado Allah, lamo lambeknyo sampai juo,” katonyo Siti Juhari.
Manyahuik Sutan Samparano, “Manolah Mandeh kanduang den, kalau ditiliak-tiliak bana, pihak kapado paja nantun, diliek pi’i jo parangainyo, dipandang aka jo budinyo, sasuai jo ajaran Mandeh, indak nan tingga sabuah juo, itu labiahnyo pandai tuo, pandai mangaji nan tak tampak, pandai manyalam dalam bumi, indak pamakan minum amek, tantulah kurang lalok tidua, dek mangaji hino jo mulia, mangana tinggi jo randah, patuik badan Mandeh kuruih.
Sabab baitu kato den, lah payah denai mamikiakan, indak tampak urang nantun, nan sakarang kini nangko, basadio Mandeh tangah rumah, hasiakan lapiak jo bantanyo, santano kok lupo Mandeh tantang itu.”
Manjawab Siti Juhari, “Oi anak den Sutan Samparano, kalau taadok tangah rumah maklum pulang pado mandeh, tapi sabuah hanyo lai, Si Upiak Siti Budiman adiak Anak balun den ajari, alang sariknyo basuami, kok tabaok rukun syaraiknyo, bak santan jo tangguli, kok tingga nan sado nantun, bak alu bacukia duri, supayo karajo nan baansua, nak denai himbau adiak anak,” rundiangan habih maso nantun.
