Adat Barumah Tanggo
BIRAWARI Siti Juhari, alah dihimbau anak kandung Siti Budiman, sanan bakato hanyo lai, “Oi nak bungsu Siti Budiman, Upiak ka mari malah duduak, elok kito badakek- dakek, elok kito baampiang-ampiang, barundiang sapatah duo patah, nak masuak ka hati kau, amak kito bapadu badan, alah koh dapek tu nak kanduang, alemu urang basuami?”
Manyahuik Siti Budiman, “Kok itu Mandeh tanyokan, Mandeh maliek tiok hari, denai nan indak turun tanah, gilo di ateh rumah sajo, indak bajalan kiri kanan, siapo pulo ka maajari? Mandeh nan balun manunjuakkan, Mandeh lah lupo tantang itu.
Manjawab Siti Juhari, “Oi anak den Siti Budiman, makan pahamnyo habih-habih, dangakan pangaja mandeh kanduang, pituah niniak kanduang kau, iyolah ayah kanduang mandeh, bagala Tuanku Rajo Bana.
Tantang alemu urang basuami, kok sampai anak bajunjuangan, pabaiak pi’i kalakuan, paelok laku jo taratik, datang suami dari jauah, sambuiklah jo muko manih, hidangkan minum jomakannyo, paliekkan hati nan suci.
Kok barundiang samo gadang, calonyo usah dibukakkan, sabagaimano aka budi, tutuik di Anak mati-mati, saangok jan maangok, saangin jan buliah lalu, parik paga di Anak kanduang, tapi
42
