Sabagai pulo oi nak kanduang, muluik usah dipabarek, kok datang urang jauah hampia, naiak ka ateh rumah awak, kambangkan lapiak nan lai janiah, unjuakkan siriah di carano.
Kok lalu urang di halaman, baiak tuo atau mudo, jan dipandang hino mulia, patuik disapo dibaok singgah, manihkan muluik jo paroman, baso nan indak kamambali.
Usah bak laku urang kini, kok naiak urang ka rumahnyo, indak paduli apo-apo, sapantun urang kagadang-gadangan, baso parangai nan bak kian, gadang bana mularaiknyo, karajo nan barek takkan ringan, nan jauah takkan hampia, nan tinggi takkan randah, janlah itu dipakaikan."
Kok basuo jo urang lain, baiak duduak di tangah rami, atau di dalam alek jamu, caliak usah dipatinggi, mato usah dipalia, pandang sakali lalu sajo, usah galak dipabanyak, binaso mudo dek itu.
Jan bak cando mudo kini, malah sairiang samo gadang, atau di tangah alek jamu, indak basopan bamadeso, caliaknyo indak bahinggokan, pandang sarupo ka malawan, lah tampak hati baraninyo, galak sarupo baalamat, itulah tando iman kurang," katonyo Siti Juhari.
Manyahuik Siti Budiman, "Kok lah baitu kato Mandeh, salamo nyawo di kanduang badan, pituah indak denai lupokan, jadi tangka jadi ajimat, denai surekkan dalam hati, alah kan sanang hati Mandeh?
Kok lai umua samo panjang, sampai kapado cucu piuik, denai tunjuak denai ajakan, nan bak pituah Mandeh nantun."
Mandanga kato nan bak kian, sanang hati mandeh kanduangnyo, "Mano Upiak Siti Budiman, lambak nan daripado itu, malu jo sopan tak babateh, baso jo basi tak bahinggo, bia jo laki awak bana, janlah hilang baso-baso, pamanih muluik Anak kanduang, gadangkan inyo di tangah rami, muliakan inyo di muko rapek, takuiklah Anak lahia batin, usah pangana kiri kanan.
