Manjapuik Urang Sumando
SALAMO lambek nan bak kian, adolah garan tigo hari, lalu urang dihalaman, mukasuik naiak ka ateh rumah handak basuo jo Siti Juhari.
Alah salasai samo duduak, tasorong siriah di carano, ka lua kaduik di urang nantun, batimbang baso jo basi, ganti labiah malabiahi, ganti anjuang maanjuangkan, banyaklah rundiang jo paparan, tanyo batanyo penghidupan, sabuik manyabuik hino diri, urang bagayuang samo pandai, bak kundi ateh dulang, nan tak kanai manganaikan, rago mananti nasi masak.
Ado sabanta antaronyo, alah sudah minum jo makan, kato dimulai hanyo lai, dek pihak urang nan datang,
“Manolah mandeh Siti Juhari, sababnyo ambo datang ka mari, ambo disuruah mamak ambo, Datuak Timbangan Aluih Paham, dek titah bapak Si Upiak, Mualim Saba Palito Ati, lah bulek mangko digolekkan, kato mupakat nan ambo baok, mamintak nak Mandeh bari, mambali Mandeh pajuali, lah lamo mukasuik kami, mukasuik itu naknyo tantu, yolah nak manjapuik anak Mandeh, nan bagala Sutan Samparano, kan junjuangan Si Upiak ketek, banamo Si Cito
Dunia, anak rang Taluak Balunan 0mbak, kampuang Dalam Talago Manih,” katonyo urang nan datang.
54
