Ado sasaat sakutiko, agak dek Siti Juhari, lah dipanggia anak kanduang, iyolah Sutan Samparano, bakato garan mandehnyo, “Mano anak Sutan Samparano, urang lah datang pado mandeh, si Suri Tiru Piliehan, rang Taluak Balunan Ombak, kampuang dalam Talago Manih.
Inyo nak manjapuik Anak, ka junjuangan si upiak ketek, nan banamo Puti Cito Dunia, kamanakan pangulu nan baradat, Datuak Timbangan Haluih Paham, anak Tuanku Taguah Iman, Mualim Saba Palito Hati, laikoh suko tu Nak kanduang?”
Manjawab Sutan Samparano, “Manolah Mandeh kanduang denai, kok inyo salorong tantang nantun, indak denai duo bicaro, makdum pulang pado Mandeh, tapi sungguahpun baitu, denai manyahuik nan taraso.
Pikiri banalah di mandeh, kok denai ketek mudo matah. aka kurang pandapek balun, kiro-kiro balun bapakai, buruak budi dapek di urang, Mandeh juo nan kan malu, sungguah baitu kato denai, pulang maklum pado Mandeh.”
Manjawab Siti Juhari, “Oi nak kanduang Sutan Samparano, pado pikiran mandeh surang, kalau itu urang nan datang, pucuak dicinto ulam tibo, batang tasanda pado gunuang, urek tahunjam ka pitalo, jikok tak datang kito nan manjapuik, jikok indak namuah kito kabia, patuik diuruikkan nan ka muko.
Lah denai tiliak-tiliak bana, sajak di asa jo usuanyo, sampai kapado niniak muyangnyo, atau kapado dang bapaknyo, Mualim Saba Palito Hati, kalau diuji samo merah, kalau ditahia samo barek, lah patuik Buyuang pulang ka kiun,” katonyo Siti Juhari.
Manjawab Sutan Samparano, “Kok lah baitu janyo Mandeh,sapanjang titah denai junjuang, indaklah denai manyalahi.”
Dek lamo bakalamoan, lah sampai janji tigo hari, datanglah urang nan dahulu, Si Suri Tiru Piliehan, lah sudah minum jo makan, bakato
sanan Si Suri, “Manolah Mandeh janyo ambo, iyolah ambo datang ka
58
