mari, maulang kato nan dahulu.”
Manjawab Siti Juhari, “Lorong kapado rundiangan kito, rasonyo indak basalisiah, sapanjang pintak ambo bari, tapi samantangpun baitu, kito buek janji jo padan, bahasia kito timba baliak, pado pikiran hati ambo, eloklah ditujuah hari bulan, harinyo baiak sahari tu, patang Kamih malam Jum’at.”
Manjawab pulo Si Suri, “Kalau baitu kato Mandeh. ambo tarimo jo hati suci,” si Suri pulang hanyo lai.
Samantaro mananti janji, alah basiap Siti Juhari, mancari barang nan indak ado, baitu pulo di pihak parampuan, lah hasia kaduo pihak, janji diulang hanyo lai, alah mupakat padu padan, lah tantu ukua jo jangkonyo.
Janji tibo nikah lah sampai, lah kawin Sutan Samparano jo Si Upiak Cito Dunia, bak jangguik pulang ka daguak, bagai pisang masak saparak.
Tarantang aka kalimpanang
Tasisik di paku kawek;
Kok dirantang hanyo kan panjang
Kini elok kito pasingkek.
Alah patuik jarami lapuak
Alah lamo batang tarandam;
Alah patuik mato takantuak
Hari lah laruik tangah malam.
60
